க.பி.கவிதைகள்

க.பி.கவிதைகள்
——————————————————————————–
தொலைத்த முகம்
தொலைவில் கண்டதும்
கோடானுகோடி கேள்விகள் கரைபுரண்டோட
ஒற்றை வார்த்தை விசாரிப்பில்
கடந்துவிடுகின்றது காலம் பதில்களின்றி
-விழியன்
——————————————————————————–
மழை நின்ற பின்னரவில்
கனவில் காணாததை கண்டு
கரம் பற்றி
கன்னம் வைத்து நீ உறங்க
விடியல் எதற்கு விரைவாய் வந்தது
-விழியன்
——————————————————————————–
மழலையின் முதல்நாள் பள்ளி அனுபவ
ஆனந்தத்துடனும் பரவசத்துடனும்
ஆயிரமாயிரம் கதைகள் சொல்ல
நொடிகள் கடத்தி நீ காத்திருந்தாலும்
அணைத்தபடி அத்தனையும் சொல்லு
இமைக்காமல் கேட்கின்றேன்
இரவின் இருட்டு தீரும்வரை
-விழியன்