Skip to content

சிறார் இலக்கியத்தின் பிதாமகன் – ஜான் நியூபெரி

September 21, 2016

சிறார் இலக்கியத்தின் பிதாமகன் – ஜான் நியூபெரி

தற்சமயம் நாம் வெற்றிகரமாக பள்ளி கல்வியில் புகுத்தியுள்ள “Joy of Learning” முறையை ஜான் லாக்கி 1740களில் பரிந்துரைத்துள்ளார். இவருடைய கல்வி முறையை உத்தியை வெற்றிகரமாக செயல்படுத்தி அதனை புத்தக வடிவில் கொண்டு வந்தவர் ஜான் நியூபெரி. இவரே உலக சிறார் இலக்கியத்தின் பிதாமகன் என்று அழைக்கப்படுகின்றவர். தன்னுடைய முதல் நூலான A Little Pretty Pocketகை வண்ணமயமான, பிரகாசமான தாள்களில் வெளியிட்டார். நூலினை சிறுவன் வாங்கினால் அவனுக்கு ஒரு பந்தும், சிறுமி வாங்கினால் அவளுக்கு ஒரு ஊசிப்பஞ்சும் கொடுக்கப்பட்டது. இந்த பொருட்களை வைத்து அவர்களின் நற்செயல்களை ஊசி குத்தி விளையாடினார்காளாம். சிறார் இலக்கியத்தின் பிதாமகனாக இவரை கொண்டாட பல காரணங்கள் உள்ளன. இவரே இதனை வணிக வெற்றியாக்கினார். இவரே முதன்முதல் சிறுவர் இதழிற்கான வடிவத்தினை 1751-52ல் கொடுத்துள்ளார். இவருடைய The History of Little Goody Two-Shoes (1765) தான் முதல் சிறார் நாவல் என கருதுகின்றனர்.

– விழியன்

Advertisements

சிறுவர் விளையாட்டு பாடல்கள் சில..

September 7, 2016

சிறுவர் விளையாட்டு பாடல்கள் சில..

சின்ன சின்னக் கல்லு பொறுக்கி
சிங்காரமா பாலங் கட்டி
பாலத்து மேல ஏறிக்கிட்டு
பபூன் வேஷம் போட்டுகிட்டு
தில்லாலங்கடி தில்லாலே
எனக்கு மீசை நல்லால்லே !

—-

எங்க வீட்டு நாய்
எலும்பு திங்கப் போச்சு
கல்லால அடிபட்டு
காலு ஒடிஞ்சு போச்சு

—-

அடடா அடடா அண்ணாமலை
அண்ணாந்து பாத்தா ஒண்ணுமில்லே
போகப் போக ஜவுளிக்கடை
போயிப் பாத்தா இட்லிக்கடை
இட்லிக்கும் சட்னிக்கும் சண்டை வந்ததாம்
ஈரோட்டு மாமனுக்கு தொந்தி வந்ததாம்

—-

எங்கப்பா உங்கப்பா – தகர டப்பா
எங்கம்மா உங்கம்மா – மனோரம்மா
எங்கண்ணன் உங்கண்ணன் – வெளக்கெண்ணே
எங்கண்ணி உங்கண்ணி – தேங்காத்தண்ணி
எங்க பாட்டி உங்க பாட்டி – தலையாட்டி
எங்க தாத்தா உங்க தாத்தா – வெண்ணெய்த் தாத்தா
எங்க் தம்பி உங்க தம்பி – கரண்டு கம்பி
எங்கக்கா உங்கக்கா – வெண்டக்கா

—-

டாம் டூம் பருப்பு
தவலையில வேகுது..
மைசூர் அப்பளம்
பெங்களூர் பாயாசம்
சம்பந்தியக் கூப்பிடுங்க..
சாப்பாடு போடுங்க
வெத்தல பாக்கு வையுங்க..
வெளியே புடிச்சுத் தள்ளுங்க !

—-

மழை வருது… மழை வருது
கொடையப் புடிங்க
முக்காப் படி அரிசி போட்டு
முறுக்கு சுடுங்க..
ஏர் உழும் மாமனுக்கு
எடுத்து வையுங்க
ஊரு சுத்து மாமனுக்கு
சூடு வையுங்க

(நன்றி – பெருந்துறை வட்டம் சிறுவர் விளையாட்டு பாடல்கள் ஆய்வு – உஷாராணி – பெரியார் பல்கலைக்கழகம்)

தமிழில் வெளிவந்த சிறுவர் இதழ்கள்/ வெளிவந்த ஆண்டு

September 6, 2016

தமிழில் வெளிவந்த சிறுவர் இதழ்கள்/ வெளிவந்த ஆண்டு

1. பாலதீபிகை – 1840
2. சிறுபிள்ளைகளின் நேசத்தோழன் – 1841
3. பாலியர் நேசன் – 1859
4. பாலர் தூதன் – 1905
5. பாலியர் மித்ரன் – 1911
6. பாலிய சஞ்சாரி – 1912
7. பால விநோதினி – 1918
8. பால வித்யா – 1930
9. பால சிந்தாமணி – 1935
10. சிறுவர் அறிவுக்கதி – 1935
11. பால போதகன் -1938
12. பாப்பா – 1941
13. அணில் – 1946
14. அம்புலிமாமா – 1947
15. வானவில் – 1948
16. செளசெள – 1948
17. கல்கண்டு – 1948
18. மாணவர் விருந்து – 1949
19. சந்திர ஒளி – 1949
20. பேபி – 1949
21. பிங் பிங் – 1949
22. ஜில் ஜில் – 1949
23. ரயில் – 1949
24. சித்திரக்குள்ளன் – 1949
25. ரசமணி – 1949
26. தம்பி – 1949
27. பாபுஜி – 1949
28. கண்ணன் – 1960
29. கிண்கிண் – 1949
30. பூஞ்சோலை – 1951
31. கதா மலர் – 1951
32. சாக்லெட் – 1952
33. பாலபாரதி – 1953
34. சிறுவர் முரசு – 1954
35. கரும்பு – 1954
36. பால்கோவா – 1954
37. பொக்கிஷராணி – 1954
38. தமிழ்ச்சிட்டு – 1966
39. அரும்பு – 1966
40. இந்திரஜால காமிக்ஸ் – 1966
41. பாலர் பூங்கா – 1967
42. பூந்தோட்டம் – 196
43. பால மித்ரா – 1978
44. ரத்னபாலா – 1978
45. ராக்கி – 1979
46. கோகுலம் – 1982
47. துளிர் – 1986
48. சுட்டி விகடன் – 1999
49. தும்பி – 2016
50. குட்டி ஆகாயம் – 2016
51. மின்மினி – 2015
52. பூந்தளிர் – 1984
53. சித்தாரா – 1980
54. பால பாரதம் –
55. பெரியார் பிஞ்சு – 2010
56. ஸ்வீட் – 1980
57. மணி பாப்பா – 1970
58. மான் – 1940
59. முயல் – 1970
60. ரவி – 1950
61. பாபுஜி – 1940
62. சந்திர ஒளி – 1940
63. கங்கணம் – 1970
64. அல்வா – 1950
65. வெற்றிமனி – 1950
66. அணில் மாமா – 1950
67. தம்பீ – 1949
68. சுட்டி – 1981
69. ஆராய்ச்சி மணி
70. மத்தாப்பூ – 1940
71. மான் – 1940
72. டுமீல் – 1940
73. பாப்பா மாலா – 1940
74. சிறுமி – 1940
75. முயல் – 1940
76. மிட்டாய் – 1940
77. சங்கு – 1940
78. கோமாளி – 1940
79. பூஞ்சோலை – 1940
80. டமாரம் – 1940
81. பாலர் ராஜ்ஜியம் – 1940

82. பொம்மை வீடு

83. கண்ணாடி

84. பஞ்சுமிட்டாய் – 2016 (மின்னிதழ்)

இணைப்பு இதழ்களாக வருபவை:
தங்கமலர், சிறுவர் மலர், பட்டம், சிறுவர் மணி, மாயாபஜார்

தொகுப்பு – விழியன்

நன்றி : இணையம், தமிழ்நாளேடுகளின் சிறுவர் இதழ்கள் உள்ளடக்க பகுப்பாய்வு – புவனேஸ்வரி (2006), http://www.thamizham.net

குழந்தைகள் எழுத்தாளர்கள் பட்டியல்

April 28, 2016

தமிழில் தற்சமயம் குழந்தைகளுக்கு எழுதிவரும் எழுத்தாளர்களின் பட்டியல். பெரும்பாலான பேராசிரியர்கள், ஆசிரியர்கள், பெற்றோர்கள், மாணவர்களுக்காக செயல்படும் செயல்பாட்டாளர்களுக்கு எழுத்தாளர்களின் பெயர்கள் கூட அறிமுகமாகாத நிலையில் பெயர்களையாவது தெரிந்திருக்க வேண்டும் என்ற முயற்சி. 1975ல் குழந்தைகள் எழுத்தாளர்களின் வெள்ளி விழா கொண்டாடியபோது 400 குழந்தைகளுக்கான எழுத்தாளர்களின் பெயரை/விவரங்களை வெளியிட்டு இருக்கின்றார்கள், அங்கிருந்து வெகுவாக குறைந்துள்ளோம் ஆனால் எழுச்சி நோக்கி நகர்ந்துகொண்டிருக்கின்றோம்.

(விழியனும், விஷ்ணுபுரம் சரவணனும் தொகுத்த பட்டியல். விழியனும் விஷ்ணுபுரம் சரவணனும் குழந்தைகளுக்காக எழுதி வருபவர்கள்)

1. யூமா வாசுகி (மொழிபெயர்ப்பு)
2. ஆயிஷா நடராசன்
3. எஸ்.ராமகிருஷ்ணன் (நாவல், கதைகள்)
4. ஞாநி
5. விழியன்
6. விஷ்ணுபுரம் சரவணன்
7. கோ.ம.கோ.இளங்கோ (கதை, நாவல், மொழிபெயர்ப்பு)
8. மு.முருகேஷ் (கதைகள்)
9. உதயசங்கர்
10. ஜெயமோகன்
11. பாலு சத்யா
12. பெ.கருணாகரன்
13. கன்னிக்கோயில் ராஜா
14. த.வி.வெங்கடேஸ்வரன்
15. லலிதாமதி
16. ரமேஷ் வைத்யா
17. வேலு சரவணன்
18. சுப்ரபாரதி மணியன்
19. நக்கீரன்
20. யாழினி
21. சுட்டி விகடன் யுவராஜ்
22. சுகுமாறன்
23. ஜெ.விக்னேஷ்
24. மதுரை சரவணன்
25. உடுமலை
26. மருதன்
27. சாய் சுந்தர்ராஜன்
28. குமாரநந்தன்
29. பேரா.மோகனா
30. ஆசிரியர் மாதவன்
31. ஜீவா ரகுநாத்
32. சைதன்யா
33. அதிஷா
34. பேரா.மாடசாமி
35.வேலு சரவணன் (நாடகங்கள்)
36. செல்வக்குமார் பழனிச்சாமி (எலி)
37. ஹரீஷ்
38. தேவிகாபுரம் சிவா
39. முரளிதரண்
40. பாண்டியராஜன் (மதுரை)
41. சி.ராமலிங்கம்
42. ஏற்காடு இளங்கோ
43. பிஞ்சண்ணா
44. ச.தமிழ்செல்வன்
45. கெளரி
46. ஆதி வள்ளியப்பன்
47. சந்திரா பிரவீன்குமார்
48. புதுகை அப்துல்லா
49. பேரா. ஜாம்
50. மதுமிதா
51. கெளரி நீலமேகம்
52. கலைவாணன்
53. வெ. ஸ்ரீராம் (குட்டி இளவரசன்)
54. ‘மா’ ( ஏ.எஸ்.பத்மாவதி)
55. வீ.பா.கணேசன் (மொழிபெயர்ப்பு)
56. யெஸ்.பாலபாரதி
57. சரவணன் பார்த்தசாரதி (மொழிபெயர்ப்பு)
58. சொக்கன் (கதைகள், கட்டுரைகள்)
59. நீதிமணி
60. விஜயபாஸ்கர் விஜய்
61. வெற்றிச்செழியன்
62. வாமு.கோமு
63. பாலசுப்பிரமணியன்
64. பாவண்ணன்
65. முத்து
66. கோவை சதாசிவம்
67. அ.முருகானந்தம்
68 ஷாஜகான் (மதுரை)
69. சாலை செல்வம்
70. கொ.மா.கோதண்டம்
71. எஸ்.சுஜாதா
72. தஞ்சாவூர் கவிராயர்
73. ஆனந்த் செல்லையா
74. அராத்து
75. விக்னேஷ்
76. தேமொழி செல்வி
77. ஞானேஷ்வர்
78. எஸ்.பாலகிருஷ்ணன்
79. மணதுணைநாதன்
80. சரண்யா
81. பிரபு ராஜேந்திரன்
82. ராஜேஷ் (பஞ்சுமிட்டாய்)
83. தேசிங்கு (பஞ்சுமிட்டாய்)

(தொகுப்பு விழியன் & விஷ்னுபுரம் சரவணன் – இவர்களும் எழுதுவாங்க)

ஜோரா போகலாம் சுற்றுலா! (சிறுவர்களுக்கான கட்டுரை)

April 28, 2016

ஜோரா போகலாம் சுற்றுலா! – விழியன்
(நன்றி சுட்டி விகடன்)

சுற்றுலா போல சந்தோஷமான விஷயம் வேறு இருக்க முடியுமா? ஒரு வாரமோ, ஓரிரு நாட்களோ… வருடம் முழுக்க காத்திருந்த அந்த உற்சாக நாட்களை முழுமையாக அனுபவிக்க என்னவெல்லாம் செய்யணும், என்னவெல்லாம் செய்யக் கூடாது? வாங்க, ஒரு ரவுண்ட் பார்ப்போம்!

பயணத்துக்கு முன்…

எப்படி பயணிக்கப்போகிறோம், எங்கே தங்கப்போகிறோம் போன்ற ஏற்பாடுகளை பெரியவர்கள் கவனிக்கட்டும். நீங்கள், ஒரு நோட்டுப் புத்தகம் எடுங்கள். அப்பாவுக்கு, அம்மாவுக்கு, தாத்தாவுக்கு, தங்கைக்கு என ஒவ்வொரு பக்கத்தை ஒதுக்குங்கள். ஒவ்வொருவருக்கும் தேவையான பொருட்களை அவர்களிடம் கேட்டு பட்டியலிடுங்கள். அவற்றில் எதையெல்லாம் முன்கூட்டியே எடுத்துவைக்கலாம் எனப் பார்த்து எடுத்துவையுங்கள்.

குடை, ஃப்ளாஸ்க், ஸ்பூன் போன்ற பொதுவான பொருட்களுக்கு ஒரு பக்கம் ஒதுக்குங்கள். எத்தனை டிராவல் பேக், அவற்றின் ஜிப் சரியாக இருக்கிறதா போன்றவற்றைப் பரிசோதித்து சரிசெய்யுங்கள்.

இரண்டு, மூன்று துணிப் பைகளை எடுத்துக்கொள்ளுங்கள். போகும் இடங்களில், வாங்கும் பொருட்களை அவற்றில் வைக்கலாம். இதனால், பிளாஸ்டிக் கவர்களில் வாங்குவதைத் தவிர்த்து, சுற்றுச்சூழலைக் காக்கலாம்.

chutti-sutrla

பயணத்தின்போது…

உங்கள் சுற்றுலாவை ரயில் அல்லது பேருந்தில் ஏறியதில் இருந்தே ஆரம்பித்துவிடலாம். பயணத்தின்போது வெளியே பார்த்துக்கொண்டே வாருங்கள். எந்த ஊர்களைக் கடக்கின்றோம், அந்த ஊரின் அடையாளம், சாலை ஓரங்களில் உள்ள மரங்கள், கிராமத்து தெய்வங்களின் சிலைகள் என ரசியுங்கள். செல்போனில் விளையாடுவதைத் தவிருங்கள். வழியில் வரும் ஸ்டேஷன்களின் பெயர்களைக் குறித்துக்கொள்ளுங்கள்.

பயணத்தின்போது வெளி உணவுகளைத் தவிருங்கள். குறிப்பாக, எண்ணெய்யில் பொரித்த நொறுக்குத்தீனிகள் உடலுக்கு ஒவ்வாமல், சுற்றுலாவின் இன்பத்தையே கெடுத்துவிடும்.

சுற்றுலாத் தலத்தில்…

கண்களையும் காதுகளையும் அகலத் திறந்து கொள்ளுங்கள். நீங்கள் போகும் சுற்றுலாத் தலம் ஒரு மலைப்பிரதேசமாக இருக்கலாம், புனிதத் தலமாக இருக்கலாம். அவற்றின் வரலாறு, சிறப்புகளைத் தெரிந்துகொள்ளுங்கள். அந்த ஊரின் மொழி, உணவு வகைகளைக் கவனியுங்கள்.

மலைப் பகுதியில் செல்லும்போது கவனமாக இருங்கள். வேகமாக ஓடாதீர்கள். மரங்கள் உள்ள இடங்களில் சட்டெனச் சென்றுவிடாதீர்கள். மரத்தின் அடியில் கரையான், எறும்பு போன்றவை இருக்கலாம். கவனித்துச் செல்லுங்கள்.

அருவி, குளம், ஏரி போன்ற இடங்களுக்குச் செல்லும்போது கவனமாக இருங்கள். பாறையில் வழுக்கலாம். படகுச் சவாரி போன்ற சமயங்களில் பொறுமையாக ஏறி, இறங்குங்கள்.

கூட்டமாக இருக்கும் இடங்களில், உங்களின் ஒரு கண் பெற்றோர் மீதே இருக்கட்டும். அவர்களைவிட்டு விலகிவிடாதீர்கள்.

நண்பர்களோடு சேர்ந்து உள்ளூர் சுற்றுலா செல்லும்போது மிகமிகக் கவனமாக இருங்கள். உங்களைக் கண்காணிக்க யாரும் இல்லாத அந்த இடத்தில் உற்சாகத்தில் என்ன செய்கிறோம் எனத் தெரியாது. கடற்கரைக்குச் சென்றால், தண்ணீருக்குள் நீண்ட தூரம் செல்வதை முற்றிலும் தவிர்க்க வேண்டும்.

ஒரு சுற்றுலா என்பது அதோடு முடிவது இல்லை. திரும்பி வந்த பிறகு, நீங்கள் கண்டு ரசித்த விஷயங்களை எழுதுங்கள். புகைப்பட ஆல்பம் தயாரியுங்கள். அது உங்களுக்கான பொக்கிஷமாக இருக்கட்டும்.

– விழியன்
ஓவியம் – பிள்ளை

சிறுவர் இலக்கியம் – ஒரு பார்வை

April 28, 2016

சிறுவர் இலக்கியம் – விழியன்

சிறுவர் இலக்கியமா? அப்படி ஒன்று இருக்கா நம்மிடையே? சமீபத்தில் பெரிதாகப் பேசப்பட்ட சிறுவர்களுக்கான நூல் ஏதேனும் இருக்கின்றதா? ஆமாம் சிறுவர்கள் வாசிக்கின்றார்களா? அவர்களுக்கு யாரேனும் எழுதுகின்றார்களா? முதலில் சிறுவர் இலக்கியம் என்று கூறுவது எதனை?

சிறுவர் இலக்கியம் என்பது பேசத்துவங்கும் குழந்தை முதல் சுமார் பதினான்கு வயது வரையிலான குழந்தைகளுக்கான இலக்கியம் என்று கூறலாம். ஏழு வயது வரையிலானோர்க்கான இலக்கியத்தைக் குழந்தை இலக்கியம் என்றும் அதற்கும் அதிகமான வயதினருக்கானதைச் சிறுவர் இலக்கியம் என்று வகைப்படுத்துகின்றனர். இரண்டு வகையினருக்குமான தேவை, வடிவம், களம், மொழி ஆகியவை நுட்பமாக மாறுபடும். ஆனாலும் பொதுவாக இவை இரண்டும் சிறுவர் இலக்கியம் என்றே பரவலாக வழங்கப்படுகின்றது. சிறுவர் இலக்கியத்தின் வடிவங்களாக எவை எல்லாம் சேர்த்துக்கொள்ளலாம்? கதைகள், பாடல்கள், கவிதைகள், கட்டுரைகள், நாவல்கள், அறிவியல் கட்டுரைகள், நாடகங்கள், சினிமா, சித்திரக்கதைகள், துணுக்குகள் இவை அனைத்தும் அடங்கும். அச்சு ஊடகம் பிரபலமான பின்னர் மேற்கில் இருந்து தான் சிறுவர் இலக்கியம் என்ற தனிப்பிரிவு வீரியம் கொண்டது எனலாம். அதற்கு முன்னர் சிறுவர்க்குப் பெரியவர்களுக்கு என்ற பிரிவு கிடையாது.

தொன்மையில் சிறுவர் இலக்கியம்

தாயின் ஆராரோ பாடலில் தான் குழந்தைக்கு இலக்கியம் அறிமுகமாகின்றது. இதுவே சிறுவர் இலக்கியத்தின் முன்னோடியாக இருக்க வேண்டும். எந்தக் காலத்தில் இது துவங்கியது என்ற வரலாறு நம்மிடம் இல்லை. ஆராரோ தாலாட்டு மனிதன் நாகரீமகாக வாழத்துவங்குவதற்கு முன்னர் இருந்தே இருந்திருக்க வேண்டும். ஆனால் முன்முதல் பதிவு நமக்கு அகநானூற்றில் கொற்றங்கொற்றனாரிடம் (54வது பாடல்) தாலாட்டு பாடல் மூலம் பதிவாகி இருக்கின்றது. தாயோ அல்லது செவிலித்தாயோ நிலவினைக் காட்டிச் சோறு ஊட்டுவது போன்ற பாடல்.

அடுத்து கிடைக்கும் பதிவு ‘விடுகதை’ வடிவத்தில் தொல்காப்பியத்தில் இருக்கின்றது.. இது ’பிசி’ என்று அழைக்கப்பட்டு இருக்கின்றது. விடுகதையினை விடுவிக்கப்படவேண்டிய கதை எனக் கூறலாம். தாயின் தோழிகள் (செவிலித்தாய்) விடுவிக்கும் விடுகதைகளைத் தொல்காப்பியத்தில் காணலாம். விடுகதைகள் சிறுவர்களுக்கான விளையாட்டு என்பதில் ஐயமே வேண்டாம். அதே தொல்காப்பியத்தில் (485) நாடோடிக்கதைகளுக்கான வித்தும் விதைக்கப்பட்டுள்ளது. ஒரு யானையும் ஒரு குருவியும் நட்பு கொண்டு இங்கு இங்குச் சென்று இவை இவை செய்தது என்ற குறிப்பு வருகின்றது.

பதினொன்றாம் நூற்றாண்டில் தோன்றிய ஒளையாரின் ஆத்திச்சூடி அடுத்த இடத்தில் வருகின்றது. இன்று வரையில் புதிதாய் தோன்றும் ஒவ்வொரு குழந்தைக் கவிஞரும் தனக்கானப் புதிய ஆத்திச்சூடியைப் படைக்காமல் ஆரம்பிப்பது இல்லை. ஒளவையைத் தொடர்ந்து படைக்கப்பட்ட சிறுவர்களுக்கான எழுத்து அதிவீரராம பாண்டியர் எழுதிய ‘வெற்றிவேற்கை’ “எழுத்து அறிவித்தவன் இறைவன் ஆகும்” “கற்கை நன்றே கற்கை நன்றே பிச்சைப் புகினும் கற்கை நன்றே” ஆகிய புகழ்பெற்ற வரிகள் இவர் எழுதியதே. இந்த நீதிகள் சிறுவர்களுக்காகக் கூறப்பட்டவையே. இதே போல மற்றொரு நீதிநூல் உலகநாதர் எழுதிய உலகநீதி. “ஓதாமல் ஒரு நாளும் இருக்க வேண்டாம்” என்ற வரிகள் இடம்பெற்ற நூல் இது தான்.

சிறுவர் இலக்கியத்தில் பாடல்கள்:

சிறுவர்களுக்கான பாடல்கள் மிக முக்கியமான இடத்தினைச் சிறுவர் இலக்கியத்தில் வகிக்கின்றன / வகிக்கவும் செய்யும். சந்த நயத்துடன் பாடப்படும் பாடல் பாடுபவருக்கும் கேட்பவருக்கும் மகிழ்வினைக் கொடுக்கின்றது. பாடுபவருக்கு உற்சாகமும் தொம்பும் அளிக்கின்றது. உலகை மறந்து ரசிக்க வைத்துவிடும். அம்மாவின் தாலாட்டுப் பாடலில் பாடல்கள் துவங்குகின்றது. இசைக்கான ஆரம்பப் புள்ளி அம்மாவின் ஆராரோ பாடல்கள் தான். அதன்வழியே குழந்தை கொஞ்சம் வளர்ந்து அதே போன்ற பாடல்களைக் கேட்க ஆவலாக இருக்கும்.

சிறுவர் இலக்கியத்தில் பதிவு செயப்பட்ட முதல் பாடலாகக் கருதுவது HA கிருஷ்ணப் பிள்ளை (1827-1900) இயற்றிய ‘இரட்சன்ய மனோகரம்’. அதனைத் தொடர்வது 1886 ஆம் ஆண்டில் இலங்கை யாழ்பாணத்தில் தம்பி முத்துப்பிள்ளை எழுதிய ‘பாலியக்கும்பி’ என்று வரலாறு கூறுகின்றது. அதன் பின் 1900களின் தொடக்கத்தில் அய்யாசாமி என்பவர் பால இராமாயணம எழுதுகின்றார். ராமரின் பால்ய பருவத்தை மட்டும் பாடல் வடிவில் கொடுத்த நூல்.

செய்யுள் மூலம் தான் வரலாறு, மருத்துவம், வாழ்கை முறை, நீதிநெறிகள் நமக்கு வழிவழியாகக் கடத்தப்பட்டது. செய்யுள் வடிவத்தைத் தேர்ந்தெடுத்த நோக்கம் அது மறக்கப்படாமல் இருப்பதற்கே. குழந்தைகளுக்கான பாடல்களில் ஒளவை வழியே வந்த பாரதியாரின் பாப்பா பாட்டுக் குறிப்பிடத்தகுந்தது. பாரதியார், கவிமணி, பாரதிதாசன், சுத்தானந்த பாரதி, வாணிதாசன், தமிழ் ஒளி ஆகியோர் சிறுவர் பாடல்களை இயற்றியதில் முதல்வகைக் கவிஞர்கள். இவர்களில் உச்சத்தைத் தொட்டவர் கவிமணி. ஆசியர் பணி மேற்கொண்டு அந்த அனுபவத்தைக் கொண்டே எழுதிய வகையில் கா.நமச்சிவாய முதலியார், மணை திருநாவுக்கரசு மற்றும் மயிலை சிவமுத்து அடங்குவர்.
மூன்றாவது வகை கவிஞர்கள் வள்ளியப்பா, எ.ந.கணபதி, திருச்சி பாரதம், தமிழ்முடி, புவனை கலைச்செழியன் மற்றும் லெமன். இவர்கள் பல புதிய முயற்சிகளை மேற்கொண்டனர்.

கதைகள்;
கதைகளுக்கு நம்மிடையே பஞ்சமே இருந்ததில்லை. கதை என்றால் எந்த வயதினருக்கும் பிடித்துவிடும். ஒரு கதைச் சொல்கிறேன் என ஆரம்பித்தால் எந்த வயதினரும் கேட்க ஆரம்பித்துவிடுவார்கள். நம்முள் அத்தனை ப்ரியமான இடத்தை எப்படியோ பிடித்துள்ளது. அது மகிழ்ச்சி அளிக்கக்கூடியது, கற்பனை வளத்தைத் தூண்டக்கூடுயது, இதற்கெனச் சிறப்பான திறமையும் தேவையில்லை. பாட்டி- காகம் கதையினைக் கேட்டு வளராத பிள்ளைதான் உண்டா நாட்டில்? ஆனால் இந்த கதை எங்கிருந்து வந்தது என்றே பல கதைகள் உண்டு. வாய்வழியாகவே சொல்லப்பட்டு வந்த கதைகள் 17ஆம் நூற்றாண்டில் அச்சில் வந்தது. அது வீரமாமுனிவர் எழுதிய பரமார்த்தகுரு கதைகள். அந்த கதாபாத்திரங்கள் இன்றும் நம்மிடையே நிலவுகின்றது என்பதே அது காலத்தால் அழிக்கமுடியாக ஆக்கம் எனக் கூற வைக்கின்றது. 19ஆம் நூற்றாண்டில் கதா மஞ்சரி வெளியானது. 1853ல் ஈசாப் கதைகள் தொகுக்கப்பட்டு ‘கட்டுக்கதைகள்’ என்று வெளி வந்தது. 1889ல் முதல்முதலாகச் சிறுவர்களுக்கான கதைகளை பன்ருட்டி சி.கோவிந்தசாமி வெளியிடுகின்றார், அதனைத்தொடர்ந்து அ.மாதவய்யா 1917ல் பால விநோதக் கதைகளை வெளியிடுகின்றார்.

விக்ரமாதித்தன் கதைகள், தெனாலிராமன், மரியாதை ராமன், பீர்பால், முல்லா, ஈசாப் கதைகள், அரேபிய இரவுக் கதைகள் என கதைகளுக்கு பஞ்சமேயில்லை. அதனைத்தொடர்ந்து நாடோடிக்கதைகள் பரவியது. சிறுவர் இலக்கியத்தின் பொற்காலமாக குறிப்பிடப்படுவது 1945-1955 காலகட்டம். ஏராளமான சிறுவர் இதழ்கள் வெளிவந்தது. ஏராளமான குழந்தை எழுத்தாளர்கள் போட்டிபோட்டுக்கொண்டு எழுதினார்கள்.

தொடர்கதைகளாக வெளிவந்த பல கதைகள் நாவல்களாகப் பின்னர் வெளியிடப்பட்டது. ஆர்.கே.நாராயணனின் சாமியும் சிநேகிதர்களும், தமிழ்வாணனின் பயம்மா இருக்கே, சுதனின் கள்வர் தலைவன், பூவண்ணனின் ‘பொல்லாத குண்டு’ , ரத்னத்தின் ‘சங்கனும் ரங்கனும்’ ஆகியவைகளைக் குறிப்பிடலாம். பல இதழ்கள் வெளிவந்ததால் இவை எளிதாகச் சாத்தியமானது.

பிற இலக்கியங்கள்;

பாடல், கதை, நாவல் மட்டுமே சிறுவர் இல்லக்கியம் அல்ல. சிறுவர்களுக்கான நாடகங்கள், சிறுவர்களுக்கான திரைப்படம், அறிவியல் கட்டுரைகள், வரலாற்றுக் கட்டுரைகள், ஒலி நிகழ்வுகள் என்று ஏராளம் இருக்கின்றது. 1950க்கு பின்னர் ஒவ்வொரு துறையும் செழித்தது எனலாம். குழந்தைகளுக்கான எழுத்தாளர்கள் போட்டி போட்டுக்கொண்டு எழுதினர். சிறுவர்களும் தன் கைகாசினைக்கொண்டே புத்தகக்களையும் இதழ்களையும் வாங்கினர். அவ்வகையில் சித்திரக்கதைகள் பெரும் ஈர்ப்பினைச் சிறுவர் மத்தியில் ஏற்படுத்தியது. அதற்கு ஈடு கொடுக்கும் வண்ணம் கதைகளும் ஓவியங்களும் அமைந்தது. சித்திரக்கதைகள் சிறுவர் இலக்கியத்திற்கான பெரும் வரம் எனலாம்.

தமிழில் சிறுவர்களுக்கான மொழிபெயர்ப்பு நூல்கள்

ரஷ்ய நாட்டுடன் ஏற்பட்ட நல்லுறவில் மிகமுக்கியமான நன்மை நம் குழந்தைகளுக்குக் கிடைத்த நூல்கள். வேறு நாட்டின் கதையினை நம் மொழியில் படிப்பது தனிச்சுவை. உயர்தர் தாள்களில் தரமாக வந்த ரஷ்ய நூல்கள் பெரும்வரும். அதே போல அண்டை மாநிலமான கேரளத்தில் இருந்தும் நிறைய மொழிபெயர்ப்புகள் வந்தன/ வந்துகொண்டு இருக்கின்றன. ஆங்கிலத்தில் வெளிவந்து கிளாசிக்காகக் கொண்டாடப்பட்ட நூல்கள் தமிழில் வெளிவந்துள்ளது என்றாலும் ஏனோ அவை பெரும்கவனைத்தைப் பெறவில்லை. 1970களிலேயே ஆலிசின் அற்புத உலகம் மொழிபெயர்க்கப்பட்டது. ஆனாலும் எஸ்.ராமகிருஷ்ணன் மொழிபெயர்த்த பின்னரே கொஞ்சம் கவனத்தைப் பெற்றது. தொடர்ந்து வெளிவந்துகொண்டு இருந்தாலும் கேரளத்தைப் பார்த்து ஏக்கம் கொள்ளவேண்டியது தான். அரசே முறையான நிறுவனம் கொண்டு வெளிநாடுகளுடன் ஒப்பந்தம் செய்து மொழிபெயர்ப்புகளைச் செவ்வனே செய்து வருகின்றது. அந்நிலை எங்கும் வரவேண்டும்.

சிறுவர் இலக்கியம் முன்னிருக்கும் சவால்கள்;

கல்விச்சூழல் மதிப்பெண் நோக்கியபடியே இருக்கிறது. மாணவன் பாடபுத்தகத்தைத் தாண்டி வாசிப்பது கிட்டத்தட்டப் புஜ்ஜியம் தான். சில ஆண்டுகளுக்கு முன்னர் இருந்த வாசிப்பும் (கோகுலம், பூந்தளிர், ராணி காமிக்ஸ், லயன் காமிக்ஸ், சிறுவர் மலர்கள் மற்றும் இன்னபிற சிறுவர் இதழ்கள்) குறைந்துவிட்டது. அடுத்ததாக ஆசிரியர்களும் தன்முனைப்புடன் நூல்களை அறிமுகம் செய்வது, விவாதிப்பது இல்லை. இந்தப்பக்கம் பெற்றோர்களும் ஆர்வம் காட்டுவதில்லை. வாசிப்பு குறைவாக இருக்கும் பட்சத்தில் பதிப்பாளர்களும் முதலீடு செய்ய தயங்குகின்றனர். இதனால் குறைவான செலவில் வரவேண்டிய புத்தகங்களும் அதிக விலையில் வெளிவருகின்றது. புதிய முயற்சிகளை ஊக்கப்படுத்த ஆட்கள் இல்லை. அதே பழைய கதைகளை (தெனாலிராமன், பஞ்சதந்திர கதைகள், மரியாதை ராமன் கதைகள்) வைத்தே காலம் போகின்றது. கைகளைக் கடிக்காமல் இருக்க வழிவகைச் செய்துகொள்கின்றனர்.இப்படி நிலவும் சூழலில் குழந்தைகளுக்காக எழுதும் எழுத்தாளன் நுழைவது பெரும் சிரம்மாகிவிடுகின்றது.

வார்த்தைகளில் எளிமை, அபார கற்பனைத்திறன், பொருளில் இனிமை, குழந்தைகளுடனானத் தொடர் பரிச்சியம், அவர்களின் மன உலகம், அவர்களின் வார்த்தை அகராதி, தற்காலக் குழந்தைகளின் வாழ்கைமுறை, விளையாட்டுகளை அறிந்துகொள்ளுதல், பொருத்தமான ஓவியர்கள் அமைதல், சரியான பதிப்பாளர்களைத் தேர்வு செய்தல் என்று பல சவால்களை ஒவ்வொரு சிறுவர்களுக்கான எழுத்தாளர்களும் எதிர்கொள்ள வேண்டி இருக்கின்றது.

சிறுவர் இலக்கியம் செழிக்க செய்ய வேண்டியவை

1975ல் நடைபெற்ற குழந்தைகள் எழுத்தாளார் சங்கத்தின் வெள்ளிவிழா சாதனைப்பட்டியலில் சுமார் 400 குழந்தைகள் எழுத்தாளர்களின் முகவரியினைப் பிரசுரித்து உள்ளது எனக் குறிப்பிடப்பட்டுள்ளது. சுமார் 50 குழந்தைகளுக்கான இதழ்கள் வெளிவந்துள்ளது. ஆனால் அவற்றின் நிலை இன்று நேர்மாறாக உள்ளது. ஆயிரம் காரணங்களை அடுக்கினாலும் சிறுவர்களுக்கான இலக்கியத்தைப் புறந்தள்ளிவிடமுடியாது. தள்ளவும் கூடாது. இது பல முனைகளில் இருந்து செயல்படவேண்டிய தருணம். ஆசிரியர்கள் மற்றும் பெற்றோர்களிடையே பாடதிட்டம் தாண்டி புத்தகங்களை வாசிக்கவும் நேசிக்கவேண்டிய அவசியத்தை உணர்த்திச் சிறுவர்கள் வாசிப்பதை உற்சாகப்படுத்த வேண்டும். வாசிப்பு என்பது சின்ன வயது முதலே இனிக்கச் செய்ய வேண்டும். இதனைக் கதைசொல்லல் நிகழ்வுகள் மூலம் மேலும் சுவாரஸ்யப்படுத்தலாம்.

பதிப்பாளர்களும் எழுத்தாளர்களும் கைகோர்த்துத் தற்காலச் சிறுவர்களின் தேவை / மனநிலை ஆகியவற்றைப் பகுப்பாய்ந்து தரமான புத்தகங்களைக் குறைந்த விலையில் கொண்டுவர முயற்சிக்க வேண்டும். புத்தகங்கள் எல்லாத்தரப்பு மாணவர்களும் அனுகும்விதமாக இருக்கவேண்டும். அரசும் இந்த செயலில் தலையிட்டுத் தனியாக ஒரு நிறுவனத்தை நிறுவி மொழிபெயர்ப்புகள் / சிறுவர் நூல்களைக் கொண்டுவர நல்ல தளத்தினை ஏற்படுத்த வேண்டும். புத்தகங்கள் வாழ்வை வண்ணமயமாக்கும், உயிர்கொடுக்கும் என்பதை ஒவ்வொருவரும் ஆழகாக உணர்ந்து புரிந்துகொள்வது அவசியம். அதன் மீதே சிறுவர் இலக்கியம் கட்டமைக்க முடியும். சிறுவர் இலக்கியம் துளிர்விட்டு செடியாகி, மரமாகும். நம்புவோம் நகர்வோம்.

சிறப்பாக பேசப்பட்ட நூல்கள் சில
– மலரும் முள்ளும் – அழ.வள்ளியப்பா
– பாட்டிலே காந்தி கதை – அழ.வள்ளியப்பா
– பறக்கும் பாப்பா – அழ.வள்ளியப்பா
– பயம்மா இருக்கே – தமிழ்வாணன்
– ராஜா ராணி – தங்கமணி
– சாமியும் சிநேகிதர்களும் – ஆர்.கே.நாராயணன்
– பொல்லாத குண்டு – பூவண்ணன்
– பாலர் களஞ்சியம் – கல்வி கோபாலகிருஷ்ணன்
– ஆயிஷா – இ.ரா.நடராசன்
– இருட்டு எனக்கு பிடிக்கும் – ச.தமிழ்ச்செல்வன்
– தங்கத்தீவு – வாண்டுமாமா
– மந்திரக்குளம் – வாண்டுமாமா
– நிலாப் பாட்டி – பெ.தூரன்
– நாட்டியராணி – பெ.தூரன்

– விழியன்
(நன்றி – தமிழ் புத்தகங்கள் ஓர் அறிமுகம் – தொகுப்பாசிரியர் சுப்பு)

கனவுகளை நசுக்கிவிடாதீர்கள்

September 17, 2015

குழந்தைகள் சொல்கின்றனர்  “எங்களுக்கு புத்தகங்களை தாருங்கள். எங்களுக்கு சிறகுகள் தாருங்கள். வலுவாகவும் சக்திவாய்ந்தவர்களாக இருக்கும் நீங்கள் எங்களை தூர தேசத்திற்கு தப்பிக்கவிடுங்க. மாயமந்திர தோட்டங்கள் இருக்கும் அங்கே நீண்ட மாளிகைகளை எங்களுக்கு கட்டித்தாருங்கள். நிலவொளியில் தேவதைகள் மிதப்பதைக் காட்டுங்கள், பள்ளியில் கற்பிக்கப்படுவதை எல்லாம் நாங்கள் கற்றுக்கொள்கின்றோம், ஆனால் எங்கள் கனவுகளை நசுக்கிவிடாதீர்கள்”
– ஹசார்ட் (1944)

ஹசார் ஒப்பீட்டு சிறுவர் இலக்கியத்தின் முன்னோடி. இவர் தான் “Universal Republic of Childhood”ஐ முன்வைத்தார்